תהילים פרק קיט – אות ט 

סה  טוֹב, עָשִׂיתָ עִם־עַבְדְּךָ יְהוָה, כִּדְבָרֶךָ.

סו  טוּב טַעַם וָדַעַת לַמְּדֵנִי: כִּי בְמִצְוֺתֶיךָ הֶאֱמָנְתִּי.

סז  טֶרֶם אֶעֱנֶה, אֲנִי שֹׁגֵג; וְעַתָּה, אִמְרָתְךָ שָׁמָרְתִּי.

סח  טוֹב־אַתָּה וּמֵטִיב; לַמְּדֵנִי חֻקֶּיךָ.

סט  טָפְלוּ עָלַי שֶׁקֶר זֵדִים; אֲנִי, בְּכָל־לֵב אֶצֹּר פִּקּוּדֶיךָ.

ע  טָפַשׁ כַּחֵלֶב לִבָּם; אֲנִי, תּוֹרָתְךָ שִׁעֲשָׁעְתִּי.

עא  טוֹב־לִי כִי־עֻנֵּיתִי לְמַעַן, אֶלְמַד חֻקֶּיךָ.

עב  טוֹב־לִי תוֹרַת־פִּיךָ מֵאַלְפֵי, זָהָב וָכָסֶף.