תהילים פרק קיט – אות מ
צז מָה־אָהַבְתִּי תוֹרָתֶךָ: כָּל־הַיּוֹם, הִיא שִׂיחָתִי.
צח מֵאֹיְבַי, תְּחַכְּמֵנִי מִצְוֺתֶךָ: כִּי לְעוֹלָם הִיא־לִי.
צט מִכָּל־מְלַמְּדַי הִשְׂכַּלְתִּי: כִּי עֵדְוֺתֶיךָ, שִׂיחָה לִי.
ק מִזְּקֵנִים אֶתְבּוֹנָן: כִּי פִקּוּדֶיךָ נָצָרְתִּי.
קא מִכָּל־אֹרַח רָע, כָּלִאתִי רַגְלָי לְמַעַן, אֶשְׁמֹר דְּבָרֶךָ.
קב מִמִּשְׁפָּטֶיךָ לֹא־סָרְתִּי: כִּי־אַתָּה, הוֹרֵתָנִי.
קג מַה־נִּמְלְצוּ לְחִכִּי, אִמְרָתֶךָ מִדְּבַשׁ לְפִי.
קד מִפִּקּוּדֶיךָ אֶתְבּוֹנָן; עַל כֵּן, שָׂנֵאתִי כָּל־אֹרַח שָׁקֶר.
